Newyddion ....mwy 08/04/2008 Affrica i Ddolgellau! 21/06/2007 Sesiwn Fawr ar MySpace 18/06/2007 Allan Yn y Fan

Cynhaliwyd y Sesiwn Fawr gyntaf yn ôl ym 1992. Syniad criw o gerddorion lleol, aelodau’r band Gwerinos a’u ffrindiau a hoffai’r ‘craic’ traddodiadol, ydoedd yn wreiddiol. Roedd teimlad fod angen rhyw ddigwyddiad yn y dref, ac fe gofiai rhai o’r criw am hwyl Gwyl Werin Geltaidd a gynhaliwyd yn y dref ar ddechrau’r 80au. Aed ati gyda brwdfrydedd i drefnu gwyl, a llwyfanwyd y Sesiwn gyntaf honno yn eitha’ di-ffwdan! Cychwynwyd ar raddfa fechan ond yn fuan dechreuodd ddal yn nychymyg y gynulleidfa, a thyfodd. O, do, mi dyfodd!

Cynhaliwyd y Sesiwn Fawr am un mlynedd ar ddeg ar sgwâr hynafol Dolgellau fel gwyl rad ac am ddim i’r cyhoedd, a thrwy hynny wireddu’r ddelfryd o fynd â’r gerddoriaeth at y bobl. Cychwynnodd yr arlwy yn Gymreig ac yn Geltaidd ei naws ac, yn fuan, gwelwyd grwpiau ac unigolion o bellafoedd byd yn dod i Ddolgellau, gan rannu rhan o’u traddodiadau efo ni yng Nghymru. Roedd y Sesiwn yn llwyddiant, ond efo’r llwyddiant daeth rhai problemau, ac ymhen amser gwelwyd nad oedd ‘y sgwâr ddim digon mawr i’n hogia’ ni.’

Yn 2002 penderfynwyd symud o’r sgwâr ac adleoli ar faes parcio’r Marian gerllaw. Daeth yr wyl yn un lle codwyd tâl mynediad am y tro cyntaf, ac mae bellach yn denu tyrfa o 5000 yn flynyddol i fwynhau’r arlwy gerddorol amrywiol. Darlledwyd y Sesiwn Fawr ar Radio Cymru am y tro cyntaf ym 1995, ac ers 1997 fe’u teledwyd ar S4C. Bellach darlledir rhannau o’r Sesiwn yn fyw ar S4C.

Mae rhestr y bandiau a ymddangosodd yn y Sesiwn yn anhygoel. Gellir cynnwys y Super Furry Animals, Cerys Matthews, Burning Spear, The Alarm, The Levellers, Capercaillie, Oysterband, Susheela Raman, Dick Gaughan The Saw Doctors, Mozaik, Sharon Shannon, Karine Polwart, Brendan Power a Shooglenifty. Wrth gwrs mae’r rhestr o’r grwpiau Cymraeig i ymddangos yn y Sesiwn yn anferthol ac mae’n cynnwys Anweledig, Meic Stevens, Bryn Fôn a Sobin!, Bob Delyn a’r Ebillion, Gwerinos, Frizbee, Ar Log, Meinir Gwilym, a’r Moniars.

Cynhelir y Sesiwn yn flynyddol ar un o leoliadau hyfrytaf Eryri; ar lan yr Afon Wnion wrth odre Cader Idris, gyda chadernid gwenithfaen adeiladau hynafol y dre’n gefndir gwrthgyferbyniol i liw a bwrlwm yr wyl.

Oeddech chi yno? Oes gennych chi stori am ymweliad â’r Sesiwn Fawr? ‘Dan ni’n awyddus i gyhoeddi eich hanesion yn yr adran hon o’r wefan. Gyrrwch unrhyw stori i myfyr@sesiwnfawr.com

Posteri!

1992	1993	1994
1995	1996	1997
1998	1999	2000
2001	2002	2003
2004	2005	2006
2007	2008